Census 2020 | United States Census Bureau
Ania ti Census?
Kasano ti Isusungbat iti Census 2020
Masapul nga adda maysa a tao manipud iti tunggal pagtaengan a mangkompleto iti census babaen ti Internet wenno online, babaen ti telepono wenno koreo. Bilangen ti tunggal maysa nga agnanaed iti address—agraman dagiti kaiyanak, ken asino man a gagayyem wenno kameng ti pamilya a ditoy ti pagnanaedanna iti kaaduanna a gundaway.
No adda man awanan iti permanente a lugar nga pagtaengan ditoy iti Abril 1, 2020 bilangen dayta a tao.
Kasapulam Kadi ti Tulong?
No adda dagiti saludsodmo no kasano ti panangsungbatmo iti Census 2020, adda mangtulong kenka. Usaren ti pagsurotan a video iti baba tapno makompletom online ti Census 2020 wenno usaren ti naiprinta a pagsurotan tapno makompletom ti papel ti saludsod.
Ti Pagsurotan para ti Census 2020
Basaen dagiti pagannurotan no kasano a kompletuem ti papel ti saludsod.
Download PDF
Apay a Nasken?
Tunggal tawen, binilbilion a doliar a pederal a panangpundo ti magasgasto para kadagiti ospital, departamento ti panangiddep-uram, eskuela, kalsada, ken dadduma pay a rekursos a naibatay iti datos ti census.
Dagiti resulta ti census ti mangikeddeng no mano a tugaw ti maited iti kada estado iti Kongreso, ken mausar dagitoy tapno maitudo dagiti nagbebedngan para iti panagbotos ti distrito.
Ti census ket sapulen met ti Konstitusion ti Estados Unidos: Artikulo 1, Seksion 2, imandatona a ti Estados Unidos, mangiwayat iti bilang ti populasion maminsan iti kada 10 a tawen. Naaramid ti umuna a bilang idi 1790.
Kinapribado ken Kinatalged
Ti Census Bureau ket sapulen ti linteg a mangsalaknib kadagiti sungbatmo ken ti panangipanamnamana a matratar a nainget a nalimed dagitoy. Kinapudnona, tunggal empleado, isapatana a salaknibanna agingga’t tungpal biag dagiti personal nga impormasion.
Iti babaen ti Titulo 13 ti U.S. Code, ti Census Bureau ket dina mabalin nga iruar ti aniaman a personal a pakabigbigan nga impormasion maipapan kenka, iti pagtaengam, wenno iti negosiom, uray pay kadagiti ahensia a mangipatpatungpal kadagiti linteg. Ipatalged ti linteg a ti pribado a datosmo ket masalakniban ken dagiti sungbatmo, saan a mabalin nga aramaten ti aniaman nga ahensia ti gobierno wenno korte kontra kenka.
Dagiti Agala iti Census iti Lugaryo
Gagangay a paset daytoy ti Census 2020.Mabalin a makitamto dagiti trabahador ti census iti lugaryo gapu iti sumagmamano a nadumaduma a rason:
- Kitaenda no umno met laeng dagiti address a kas panagsagana iti maiwayat a census.
- Bisitaenda dagiti pagtaengan para iti census wenno para iti sabali a surbey ti Census Bureau.
- Agibunongda kadagiti impormasion maipapan iti census.
- Kitaenda dagiti trabaho a mainaig iti census.
Iti umay a Mayo 2020, dagiti agala iti census ket rugianda a bisitaen dagiti pagtaengan a di pay nangsungbat iti Census 2020 tapno masigurado a nabilang ti amin.
Kasano a Makatulongka
Irakurak ti Pakaammo
Mabalin a matulongannakami babaen ti panangibinglaymo kadagiti damag ken impormasion manipud iti Census Bureau kadagiti gagayyemmo, ken followers-mo iti Facebook, Twitter, ken Instagram.
Makikaduaka Kadakami
Ginasgasut a korporasion, nonprofit nga organisasion, agpampanday-pagalagadan, ken indibidual ti mangirakrakurak ita iti pakaammomaipapan iti Census 2020 ken no apay a napateg ti pannakipartisipar.
Makipagtrabaho Kadakami
Agrekrekrutkami ita iti rinibribu a tattao iti sapasap a pagilian a tumulong iti Census 2020. Nayonam ti matgedam bayat a tultulongam ti komunidadmo.
Yes
No
Comments or suggestions?